Semmo do 1498: i barchi do Vasco da Gama arrivan à Kozhikode – a-a giornâ d’ancheu Calicut – in sciâ còsta do Malabar. I primmi colloqui son poscibili graçie à doî interpreti feua do commun: doî möi de Tunexi che, o l’annòtta o mainâ Álvaro Velho inta seu relaçion da spediçion, o Roteiro da viagem de Vasco de Gama, «sabiam falar castelhano e genovês» – ean boin à parlâ spagnòllo e zeneise.
À l’atro cavo do mondo, a lengua de Zena a l’ea monæa corrente: di secoli de trafeghi mediterranei n’aivan fæto unna lengua franca che un interprete tunexin o l’aiva tutto l’interesse à conosce. A stöia da nòstra lengua a l’é passâ de pe lì ascì, into primmo scangio de poule tra l’Euröpa do Vasco da Gama e l’India.
